Accoort tusschen Enchuysen en die van 't West-eynde, over de Havens en Wallen, Anno 1517 den 17 Junius
Uit Bibliotheca Enchusana
- In den Jaere vijfthien hondert vijfthiene, zijne overgecomen ende eendrachtelicken gheaccordeert die Burgermeesteren van Enchuysen, Frans Frericxsoon, Arent Symonsz., Willem Evertszoon, ende Gerbrandt Pieterszoon aen d'een zijde, ende Pieter Pietersz. Graef, Pieter Nanszoon, die Vredemakers van 't Westeynde, mitten gemeenen Landt-rijcksten van den Landen, gelegen in onsen banne van Enchuysen ten anderen zijde, in den maniere hier na verklaert; als dat die Burgermeesteren voirgeschreven sullen repariren ende onderhouden die Haven van Enchuysen, mit palen ende andere middelen hem mogelick, sullen die Vredemakers voirsz. wederomme eens voir al uytreycken ende geven die Burgermeesteren van Enchuysen voirsz. vijf hondert guldens courrant, op twie termijnen, hondert Nobelen in den Jare xvj., ende noch hondert Nobelen dair an in den Jare seventhien, behoudelicken dat die Vredemaeckers voirgheschreven, sullen den Dijcke mitten Wallen, doer reparatie van den Havenen voirgeschreven beschut ende beschutten, in esse houden van Proeyen af tot Zuyder Poorte toe, ende sullen moegen die plaetsen van den Wallen voirsz. verhueren ende verpachten, sulcks dat die Burgermeesteren voirgesz. ofte hoir nacomelinghen mitten Gerechte van Enchuysen gehouden ende geoblieert sullen zijn, den voirsz. Vredemakers hulpe ende bystant te doen, sonder des te weygeren, omme soedanige huere ofte pachten der plaetsen voirgesz. oft noodt ware rechtelicken inne te gecrijgen ende te winnen op hoiren eygen kosten; ende bekennen oick mits desen die Burgermeesteren voirghesz: van den somme boven geroert, den lesten penningh mitten eersten, geheerlijcken ende wel betaelt te zijn, alle dingh sonder arge, quade ende subtile liste. In oirconde der wairheyt hebben wy Burgermeesteren der Jairs seventhien, desen Brief bezegelt mit onsen voirsz. Stede-zegel, ten faicken hier byneden aen gehanghen, Anno vijfthien hondert seventhiene, den seventhienden dagh Juny.
Bronnen, noten en / of referenties:
