Stadsrechten van Enkhuizen
Transcriptie van het originele stadsrecht .
(des woensdaghes na Sinte Pouwelsdach conversie in 't jaer ons Heren dusent drie hondert vive ende vijftich).
Hertoghe Willem van Beyeren, grave van Holland, van Zeland, here van Vriesland ende verbeyder der graefscap van Henegouwen maken cond allen luden dat wi gheg-heven hebben ende gheven voer ons ende voer onse nacomelinghe onsen lieven ende ghetrouwen luden van Enchusen ende van Gommerskerspel, omme menighen trouwen dienst dien si ons ende onsen voervorderen voertijts ghedaen hebben ende ons ende onsen nacomelinghen noch doen sullen, een vrihede ende een poertrecht allen denghenen die binnen der vrijhede voerseyt nu ter tij t wonen ofte namels woenen sullen ende aldaer poertere sijn, wilke vrihede wi willen dat enen naem hebbe ende voertmeer ghenoemt worde Enchusen, streckende noertwaert, oestwaert ende zuutwa-ert tot in der zee, ende westwaerd streckende an den ban van Boevenkerspel, langhes den wech tweehondert roeden breet. Voert soe hebben wi onsen goeden luden van onser poerte van Enchusen voerscreven ghegheven ende gheven alle alsoedanich recht, privilegiën ende hantvesten als onse goede lude van onser poerte van Medemleke van ons ende van onsen voervorderen graven te Holland bezeghelt vercreghen hebben tot desen daghe toe, daerna van deser tijt, voert alle recht te hantieren ende te rechtene binnen onser poerte van Enchusen voerseyt, gheliken dat men binnen Medemleke doet, uutghenomen dat gheen poerter van Medemleke noch buurman van Overlekerambocht poerter worden sullen tot Enchusen, wik recht, privilegiën ende hantvesten wi gheloven onsen goeden luden van onser poerte van Enchusen voer-noemd te bezeghelen ende te gheven buten horen cost soe wanneer dat wi uutscrifte daerof bi ons hebben beseghelt met witlachtigher lude zeghele, behoudeliic dat si ghene poertere hebben en sullen wonende buten hore vrihede van Enchusen. Voert waer 't dat onse poerte van Enchusen voernoemd van node namels verzet worde op een ander stede, die wi hem bi ons ende onsen rade met hoers selfs gherechte wisen sullen, soe willen wi nochtan dat onse goede lude van onser poerte van Enchusen voerscreven hebben ende vrielijc ghebruken alle alsoedanich recht, privilegiën ende hantvesten als wi hem ghegheven hebben, behoudelic dat die vrihede niet meere wesen en sal dan voerscreven es. Voert hebben wi ghegheven ende gheven onsen goe- den luden voerseyt ene jaermarct viertien daghe lanc durende, daer men alle jaere dat cruys of rechten sal vier daghe voer Sinte Jansdach decollatio tot uutghaende oest, behoudelic ons onse tollen, vervalle ende anders ons rechts, ghelijc dat wi hebben in onse poerte van Medemleke. Voert soe sullen ons onse goede lude van onser poerte van Enchusen voernoemd dienen in onse heervaert met dertich mannen, ende daertoe hebben wi hem ghegheven ende gheven te hulpe die van Boevenkerspel ende die van Grotebroec die ons met hem dienen sullen. Ende omdat wi alle dese poynten voer-screven onsen goeden luden van onser poerte van Enchusen hem ende horen nacome-linghen vaste ende ghestade houden willen tot eweliken daghen voer ons ende voer onse nacomelinghen, soe hebben wi dese hantveste open bezeghelt met onsen seghele. Ghegheven in onse stede van Dordrecht, des woensdaghes na Sinte Pouwelsdach con-versio in 't jaer ons Heren dusent drie hondert vive ende vijftich.
