Handtvest van Hertogh Johan de III. Anno 1422 den 4 Augustus; Handelt van een Capelle te maecken
Uit Bibliotheca Enchusana
- Johan by der genade Godts Paltsgrave op ten Rhyn, Hertoghe in Beyeren, Grave van Henegouwen, van Hollandt, van Zeelandt, &c. doen kondt allen luyden, want onse getrouwe stede van Enchuysen ons gunstelijck ghegheven hebben, sulcke beede als wy op dese tijdt van hen begeert hebben, soo hebben wy daerom, en om meenigen trouwen dienste die sy ons ghedaen hebben, ende of Godt wil noch doen sullen, alle hare gemeene poorteren die in der tijdt wesen sullen, geconsenteert ende gegeven, consenteren ende gegeven met desen Brieve, alsulcke Privelegien ende Rechten als hier na beschreven staen.
- Dats te weten, dat sy een Capelle fondeeren ende stichten mogen in Gommerkarspel, in dat West-eynde van der Stede, sonder daer aen te misdoen teghens ons ofte tegens ymandt van onsent weghen, ende oock de Kercke van Enchuysen op te mogen breken ende die binnen dijcks brengen, ende weder versetten ende vertimmeren alsoo als hen-luyden dat oirbaerlijckst duncken sal.
- Voort want alle breucken binnen der Stede voorsz. ons te berechten staen, of onsen Rechten aldaer van onse Heerlijckheydts weghen, soo hebben wy onse goede luyden voorseyt verder gegonnet ende geven, waert dat tot eeniger tijdt een kindt aldaer verdroncke of verbarnde, des Godt verhoede, dat die Provisoor of Deken van des Proosts wegen, noch geen geestelijcke Rechteren, hun des onderwinden of correctie daer of doen sal in gheenre manieren, ende om dat wy voor ons en onse nakomelinghen den ghemeenen poorteren van Enchuysen die inder tijdt wesen sullen, dese voorsz. poincte van rechten volkomeljcken gehouden willen hebben tot eeuwigen dagen. Soo hebben wy des te ghetuygen onsen Zegel aen desen Brief doen hangen, gegeven tot Amsterdam, op ten vierden dagh in Augusto in 't Jaer ons Heeren duysent vier hondert twee-en-twintigh.
Bronnen, noten en / of referenties:
