Handtvest van Hertogh Philips de I. Anno 1462 den 2 Mey; Van 't verleggen der Jaer-merckt
Philips by der gratie Godts Hertoge van Bourgondien, van Lottheringen, van Brabant ende van Limborgh, Grave van Vlaenderen, van Arthoys, van Bourgondien, Palatijn van Henegouwen, van Hollandt, van Zeelandt ende van Namen, Marckgrave des H.Rijcks, Heere van Vrieslant, van Salijns en van Mechelen ; doen kondt allen luyden, dat onse getrouwe stede van Enchuysen ons te kennen gegeven heeft, hoe dat sy een Jaer-merckt heeft die alle jaren licht binnen der selver onser Stede, des Sonnendaeghs voor heyligh Cruys-dagh, ende overmits dat die van den Zaecke, in Oost-Vrieslandt, die haer naebueren zijn, ende recht tegen hun over leggen, oock een Jaer-merckt hebben op ten selven properen dagh, soo is die Jaer-merckt van onse voorschreve stede van Enchuysen te arger, ons daerom ootmoedelick biddende dat wy die voorschreven Jaer-merckt, op eenen anderen dagh, verleggen ende beramen willen : ende want wy ter brede ende tot vorderschap ende welvaert van onsen voorschreven stede van Enchuysen, die op ten palen van onsen Lande gelegen is, geneyght zijn mits dat sy altijdts in onsen saken ende dienst, mit goeder herten, willigh ende bereyt sijn, ende hoopen dat sy altydts blijven sullen, die selve Jaer-merckt verandert en verleyt hebben, veranderen ende verleggen mit desen onsen Brieve, te wten dat die alle Jaers, binnen onsen voorschreve stede van Enchuysen, beginnen sal des Sonnendaeghs nae sinte Michiels dagh, ende duerende vijfthien geheele dagen, achter een volgende, mit alle alsulcke Vryheden, Privelegien, Conditien, Voorwaerden ende Manieren als den voorschreven Jaer-merckt dienende was, des Sondaeghs voir heyligh Cruys-dagh voirschreven, sonder argelist. In oirconde desen Brieve ende onsen Zegel hier aen doen hangen, gegeven op den tweeden dagh in Mey, in 't Jaer ons Heeren duysent vier hondert twee-en-sestigh.
Bronnen, noten en / of referenties:
